Partage entre Toussainct Chartier et ses beaux-frères et soeurs
7 février 1688
Du VII° jour du mois de feburier an mil six cent quattre vingt et huit
Comparurent en leurs
personnes Toussainct Chartiez, André Bonneville en action et come mary et bail
de Mary Margueritte Thelliez, Piere Bricoult en action et aussy come mary et
bail de Mary Thelliez, Margueritte Noel Thelliez encoire à marier d'aige de
vingt deux ans et Mary Michelle Thellier aussy à marier d'aige de vingt ans
demts[1]
respectivement à Clary et Caulery, lesquels comparans de leurs propre
et libre vollonté sans aulcune constraincte ny séduction ou induction ont dict
et déclaré d'avoir cejourdhuy faict partaige et divission d'un jardin content[2]
demy mencauldée ou environ amazé d'une maison et chambre et deux mencauldées
de terres et demy de terres lables[3]
en deux pieches et situé tant au terroir dudt Caulery que sur celluy
de Ligny cy après déclaré sicomme ledt jardin maison et chambre audt
Caulery tent au jardin Mary Joseph Bricoult, d'autre de deux sens
aulx jardins Paul Leduc et d'aultres abordant au devant de l'église dudt
lieu,
Item une mencauldée de terres lables tenant de deux sens aulx terres Paul Leduc, de tierche sens aulx terres de Chapptre[4] du marché Nicolas Mairesse et d'aultre à trois boistellées Jacque Labbée, et une rasière audt terroir de Ligny tenant d'une lisière à trois mencauldées occuppé par Jean Lefebure de Clary, d'aultre à une rasière Jean Simon et d'un bout à une rasière Nicolas Le Riche, ainsy que ledt jardin et terres lables dessus déclaré se comportent et extendent, à eulx appartenant en fond et propriété du chef et patrimoine de Thonette Labbée leur mère ausy pnte et comparant et par l'agréaon[5] et consentemnt d'icelle leur mère, ils ont faict ledt partaige en la forme et manière qu'il s'ensuilt, c'est assçavoir qu'après lot jettée entre eulx ledt Toussainct Chartier aura et est tombée pour sa part en laditte rasière au terroir dudt Ligny, pour icelle estre à luy propre et en jouir après le décès de laditte Thonette sa mère, Item pour la part dudt André Bonneville et Piere Bricoult, lesquels en action de leurditte femme sont tombée et auront laditte mencauldée de terres audt terroir de Caulery tent come dit est aulx terres Paul Leduc, de laquelle mencauldée laditte Thonette Labbée en aura droict de viaige et usufruict mais comme lesdts Bonneville et Bricoult en ont présentemnt besoing et affaire pour subvenir à leur plus grand proffict, laditte Thonette leur at ceddé et s'est faict mort de laditte mencauldée pour son droict de viaige, parmy par iceulx payer et satisfaire à laditte Thonette la somme de vingt florins à luy délivrer prestemnt, et c'est à raison de ladite cédition de droict de viaige,
Et pour la part desdittes Margueritte Noel et Mary Michelle Thellier sont tombé et auront pour leur part ledt jardin maison et chambre dessus déclaré, duquel jardin ledt Toussainct Chartier en avoit le droict de la sixiesme partie mais affin de n'en faire la divission pour laditte sixiesme partie laquelle ledt Toussainct Chartier leur at ceddé et acordé pour icelles jouir user et profficter de toutte ledt jardin après le décès de ladte Thonnette leur mère à condition qu'elle seront tenus et ont promis payer et satisfaire audt Chartier leur frère sitost ledt décès de leur mère à du ________ la somme de seize florins pris convenu pour la cédition dudt sixiesme de jardin et à deffault de payemnt d'icelle somme ledt Chartier poldra rentrer et prendre laditte sixiesme partie dudt jardin et en faire son proffict
Bien entendue que pour
donner éclarcissemnt de pnt partaige au regard dudt
Toussainct Chartier, lequel come estant enffant du premier et noble mariaige de
laditte Thonnette, il luy touchoit et de faict il luy appartient selon la
coustume de Cambrésis la moitié desdtes deux mencauldées et demy de
terres dessus déclaré hors de part, et partir allencontre de ses aultres frè
soeurs tette à tette en l'aultre moitié pourquoy ils ont faict ledt
partaige à telle fin que ledt Chartier at pour sa part come dessus
desdtes terres lables, laditte rasière selon qu'elle est déclaré cy
devant
Toutte lequel partaige et choses dessus dittes lesdts comparans respectivemnt ont promis tenir, entretenir, furnir et accomplir de poinct en poinct sans y contrevenir par les fois et serment de leurs personnes soub l'obligaon de tous et chacun leurs biens moeubles et immoeubles pnt et à venir, sur LX sols de paine à donner etc... renonchant etc... notament ladte Thonnette Labbé au droict de veillean et à l'autenticq sy qua mullier à elle donné à entendre. Ce fut ainsy faict et passé audt Caulery pardevant le nottaire soubsigné et en pnce d'André Thellier et Jacques Labbée habitant dudt lieu tesmoings pour ce appellée le jour mois et an que dessus
Toussaint Chartier
+ marcq Thonnette Labbée
+ marcq André Bonneville
+ marcq Piere Bricoult
+ marcq Margueritte Noel Thellier
+ marcq Mary Michelle Thellier
+ marcq André Thellier
Jacque Labbez
Boursiez, 1688, greffier, nott
Ecrit au dos
Partaige faict par Toussainct Charrtier et ses beau frères et soeurs, 1688
(Source: AD59, Tabellion de Cambrai : 2 E 26 / 96, transcription Marc Maillot)